Barbizon serna

Barbizon serna ( francavon École de Barbizon ) tir yambaf lizor awiyis koe Franca moni 1825 is inkeweyes koe Barbizon wida gee Paris drume Fontainebleau aalxo, nelkon lospas patectoyaf lingesik banlize gilinges va tuwava koe rid.

Mali tena ke XVIII^-eafa decemda, lan lingesik va skura va puntaf lordeks koe rid abdi bunera va parmaf grabom koe lingexo toz giltiyid. John Constable batinde dace askiyir. Koe Franca, Théodore Rousseau ( 1812-1867 ) va bata nuva ta redura va geltrevapaf patectoy volson gu ludeem ke cultimevafa yamba malsaveyer. Batdume inafa trutca bolkon gu winugaf bontay zo vewayad. Bam ko Barbizon va int inkeyer, i ko widama poke Fontainebleau aalxo. Ar lingesik kazokeveyed numazen Barbizon vanpiyir xocko lize geltrevaf lingesik va koswara trasiyid. Konak remi yon ilanacek kobliyid solve ar konakaviele abicedje jonvieleyed. Trogarn vas Barbizon serna bak 1890 oxam awiyir. Volto serna tir liz yambik va ckane raved voxe to doda vas yambafa niedara.

Bata lingerinda va kiewatca sizi decemda trasiyir. Bak 1849, Isle-Adam aalxo trutca ke Théodore Rousseau den bontay zo doster aze va moavafa diema war. Bal Tamefa Wonara ke Paris koe 1855, tanoya bonta gu lingesik varon zo ektur. Kot lingesik ke Barbizon serna ( pilkovon Jean-Baptiste Camille Corot is Charles-François Daubigny ) va pilkaf martig dikir, voxen sin gan kuranira va kaikfira va loveem ke cultimafa bunera zo tanad. Ant Jean-François Millet va gimbafa bunesa teza vider, rewason gu tawadayafa ordafa nakila.